法比仔教波穩陣行先
今晚繼續有意甲上演，焦點必定係科木主場迎戰AC米蘭。由西班牙名宿法比加斯執教嘅科木，表現異常硬淨，今季9場聯賽主場仍然保持不敗，其中8場總入球開2球或以下。A米仍然處於爭標行列，但近期攻力疲弱，恐怕難佔甜頭，博中位數2.5球嘅入球細。

（周五凌晨3時45分開賽）文:Mic少

法比加斯3年前喺科木展開教波生涯，並冇為球隊帶來西班牙傳統進攻元素，皆因人腳質素有限，最緊要穩陣行先，希望每場都有分落袋。科木今季防守進一步「昇華」，19場聯賽僅失13球，全個意甲失波僅次於羅馬，即使遇上勁旅呢招亦相當煞食，包括曾以2比0擊敗祖雲達斯，及悶和拿玻里0比0。不過針冇兩頭利，科木進攻難免比較單調，主要依賴阿根廷新星尼高柏斯數胡，只要A米重點看管呢位進攻中場，截斷科木攻勢泉源，後防所受壓力自然大減。

A米近期攻力滑落
A米目前正全力追趕榜首國際米蘭，但近期演出顯得有心無力，近兩場聯賽對下游弱隊熱拿亞及費倫天拿都贏唔到，連環失分都幾傷。最離譜係上場作客費倫，即使對手上半場已有1位球員被逐，A米都未能把握踢多個優勢，要到尾段先至入波驚險逼和1比1，已經連續3場總入球開2球或以下。以佢哋近期嘅疲弱攻力，要攻破固若金湯嘅科木防線，恐怕難上加難，細盤可取。