英足盃第3圈，英超豪門利物浦主場迎戰甲組仔班士利，論整體實力及經驗，無疑利物浦秤先，但「紅軍」陷入低潮，加上對住弱隊，主帥施洛好可能收起主力，不宜高估，隨時小勝了事。由於主W太熱冇肉食，兼且考慮到利物浦各項賽事近7場有6次總入球開出3球或以下，不妨再追中位數3.5球嘅入球細。（Now 651周二凌晨3時45分直播）文:Mic少

利物浦今季大部分時間表現令人失望，即使早前曾有所復甦，一度取得4連勝，但又打回原形，近3場都和波，其中2場更加冇波入，包括主場同新升班球隊列斯聯踢成0比0，對住包尾大幡狼隊，僅贏2比1，傳統勁旅霸氣蕩然無存，恐怕炒唔起班士利。事實上，利物浦首要工作始終係踢好英超及歐聯，英足盃只屬其次，加上2位前鋒阿歷山大伊沙克、艾基迪基養傷，穆罕默德沙拿踢緊非國盃，仍未歸隊，施洛手上可用進攻球員有限，為免用殘現有主力，今仗應該會輪換陣容。

班士利必屯重兵防守
至於班士利排英甲中下游位置，想偷雞博爆冷晉級，惟有屯重兵先做好防守，等待機會打突擊，否則一旦落後就難以翻身。此外，球員難得可以同英超強隊交手，肯定特別落力，當成決賽咁踢，尤其係日前非聯賽球隊馬爾斯菲FC爆冷淘汰上屆英足盃冠軍水晶宮，相信亦對於班士利有激勵作用，勢必使出渾身解數同利物浦周旋到底。