U23亞洲盃A組第2輪，東道主沙特阿拉伯U23迎戰約旦U23。沙特U23首仗旗開得勝，但1比0險勝超過半場時間10人應戰嘅吉爾吉斯U23，表現只屬一般，進攻欠銳問題未見改善，今場對住防守力唔差嘅約旦U23，開出2.5球入球細機會高唱入雲。文:工廠仔

（HOY 76台周六凌晨零時30分直播）

沙特阿拉伯U23喺意大利教頭迪比亞治奧執教下，踢法守優於攻，近7場比賽有6場不失球，上月就係靠銅牆鐵壁贏到U23海灣盃冠軍。不過沙特阿拉伯U23進攻唔夠銳利，對上8場比賽有7場總入球開2球或以下，今仗入波好可能又係1球起、兩球止，繼續爭取小勝。

約旦近期入球偏少
約旦U23實力唔及主隊，上場雖然吞咗越南U23兩蛋，不過佢哋防守力其實唔算好差，之前9場比賽都保持不敗。約旦U23近5場總入球全開2球或以下，包括喺熱身賽1比1打和勁旅日本U23，證明佢哋絕非不堪一擊，今場面對進攻乏力嘅沙特U23，相信失波唔會多，博2.5球入球細係最佳選擇。