西超盃4強上演「馬德里打吡」，馬德里體育會同皇家馬德里近況都唔錯，不過賽前爆出皇馬前鋒基利安麥巴比受傷消息，冇咗呢個進攻鎖匙人，皇馬要贏「剋星」馬體會嘅難度將大大提高，絕對冇本錢讓波，馬體會讓球主勝（+1）放心捧場。

（周五凌晨3時開賽）文:工廠仔

傷兵成籮讓波擇使
「銀河艦隊」射手基利安麥巴比喺今季各項賽事入咗29球，係球隊靈魂人物，但係最近受到膝傷困擾，今次西超盃未有隨隊出征沙特，加上艾達米列達奧、阿歷山大阿諾特等傷兵，戰鬥力大受削弱。教練沙比阿朗素嘅戰術圍繞麥巴比而建立，今場打吡大戰冇咗佢，贏波機會實會大打折扣。

相反，馬體會近5場賽事取得4勝1和，狀態唔差過皇馬，最重要係佢哋喺「馬德里打吡」往績極佳，今季就曾經主場5比2大破「銀河艦隊」，睇番兩隊近11次對賽，法定時間馬體會有3勝7和1負，輸波率不足1成，今場受讓非常着數，捧讓球主勝（+1）係明智之選。