已經被阿仙奴拋離6分嘅曼城，今晚將會繼續喺主場出擊，迎戰中游球隊白禮頓。「藍月亮」上輪主場「臨尾香」被車路士逼和，表現虎頭蛇尾，再睇番佢哋近5次同白禮頓交手，雖然只得2勝1和2負，但全部都喺半場領先，今場情況亦相同，最終未必贏到波，但半場主勝應該穩陣。（Now 623周四凌晨3時30分直播）文:邪神

曼城一直力追榜首阿仙奴，不過踏入2026年接連失利，先後同新特蘭及車路士打和連失4分，表現唔及之前咁銳利同貫徹始終，尤其係上場對車路士，半場領先之下遲遲未入「燕梳球」，卒之喺補時4分鐘失守，剛傷愈復出嘅洛迪卡斯簡迪批評隊友太「獨食」累事，可見近期球隊存在內部問題，不宜盲目追捧。

不過細心睇，曼城開賽早段入球能力仍然可靠，近10場8次半場領先，鋒霸艾寧夏蘭特固然係入球保證，中場菲爾科頓亦重拾狀態，加上另一中場雷恩達斯頻頻有「士哥」，經常喺早段輪流建功，佔得先機。

海鷗集中力不足
另邊廂，「海鷗」白禮頓今季神奇不再，最近經歷完6輪不勝，直至上場先至擊敗弱旅般尼重響勝鼓。不過，佢哋嘅弱點係早段唔集中，近5場有3次半場先落後，加上近年對親曼城都係半場先輸，相信今場佢哋都唔會例外，捧半場主勝有望輕鬆收錢。