今晚元旦日英超快車壓軸戰，新特蘭主場硬撼曼城。「黑貓」冇咗多名出戰非國盃嘅非洲兵，實力大打折扣，曼城嘅「聖誕樹」陣式順到冇朋友，加上嚟緊要鬥車仔，今仗一定想速戰速決，半場客勝有計。（Now 621及611周五凌晨4時直播）

新特蘭季初能夠異軍突起，除咗列強對佢哋唔熟悉之外，低位防守非常嚴密，配合簡單快速反擊，令敵軍措手不及。但經過大半季後，「黑貓」嘅底細開始被摸清，唔敢再輕敵，其進攻板斧太單調問題亦慢慢浮現，踢咗18輪入得20粒，硬淨有餘卻攻力不足。加上基斯甸泰比、貝特蘭查奧爾、雷尼度、馬蘇亞古同沙迪基等要參加非國盃，暫時離隊，前中後3線實力嚴重受削，連續2場和波收場，就算近5仗亦僅獲1勝，明顯跌Watt。

留力下仗鬥車路士
相反，曼城又啟動為人熟悉嘅「連勝mode」，各項賽事豪取8連勝，其中7次上半場已取得領先，由頭贏到尾，弗到咁同變陣有關。主帥哥迪奧拿近期改用4321陣式，以卓基同菲爾科頓合組雙核心，的確為艾寧夏蘭特分擔咗部分數胡重任，3人喺呢個「聖誕樹陣式」下，自11月尾合共入14球兼交出8個助攻。由於曼城下仗要對住車仔，相信哥帥希望盡快鎖定勝局，慳番啲力鬥車仔，半場客勝捧得過。