英超兩支新升班球隊交鋒，新特蘭主場迎戰列斯聯，「黑貓」新特蘭有6位球員離隊踢非國盃，實力打折扣，惟有踢穩陣波，但求唔輸已收貨。至於列斯聯近5場作客僅1和4負，預料亦無力發圍，參考雙方近8次對賽有6次總入球開2球或以下，寧願博中位數2.5球嘅入球細。（Now 621周日晚10時直播）文:Mic少

新特蘭前中後3線都有球員離隊踢非國盃，包括翼鋒基斯甸泰比、3位中場貝特蘭查奧爾、哈比迪亞拉、諾亞沙迪基，以及2位後衞馬蘇亞古、雷尼度，幾乎冇咗半隊主力，上仗殘陣作客白禮頓，奮戰之下打和0比0。事實上，新特蘭本身攻力只屬一般，往往憑拚勁同對手周旋，加上人腳不整，更加唔敢冒進，否則一旦先失波，就難以收復失地。以「黑貓」近4場聯賽3次總入球開2球或以下走勢，今仗入波唔會多。

列斯聯想入波都難
另邊廂，列斯聯近4場聯賽取得2勝2和，但2場勝仗及打和利物浦都係主場出擊，當中唯一作客僅同賓福特踢成1比1，今季8場聯賽作客只有1勝1和6負僅入7球，當中只係贏過包尾嘅狼隊，遇上防守硬淨嘅新特蘭，唔好話要贏波，恐怕連入波機會都唔大。今場和波唔夠3倍，就知雙方勢均力敵，或會出現拉鋸局面，最好揀2.5球嘅入球細。