英超史上首次出現「拆禮物日獨腳戲」，曼聯主場迎戰紐卡素自然成為焦點。場內聖誕氣氛濃厚，偏偏「紅魔」遇上近年最嚴峻嘅傷病潮，隊長兼中場靈魂般奴費南迪斯確定缺陣，令呢場節日大戰勝負更添懸念。文:謝德謙

目前聯賽形勢，曼聯以7勝5和5負、累積26分排第7位，只憑得失球力壓水晶宮。若然今晚全取3分，有望追平第4位嘅車路士，重返前列；紐卡素則以23分排第11位，作客贏波即可爬番上上半版，甚至有望反壓「紅魔」， 意同樣十足。

曼聯最大隱憂無疑來自傷病，隊長「般費」上輪對維拉半場傷退，證實為軟組織受傷，今日高掛免戰牌。自2022至23球季起，曼聯喺冇「般費」正選嘅6場英超，居然未嘗一勝（1和5負）入得4球，影響立竿見影，事實上今季「般費」已創造51次機會，並交出7次助攻，佢缺席無疑令球隊進攻力大減。加上明奈、哈利馬古尼、馬菲斯迪歷特同列傷兵名單，再有3名非洲國家盃國腳離隊，主帥魯賓艾摩廉排陣要花盡心思。

紐卡素回勇兼齊腳
相對下紐卡素人腳較齊整，近況亦有回勇迹象，各項賽事近7仗僅1敗。安東尼哥頓速度及衝擊力十足，近6次上陣直接參與6個入球，禾達美迪亦已有7個聯賽入球，火力分布平均。雖然曼聯以往「拆禮物日」成績唔錯，但缺少「般費」下能否守住呢個優良傳統，實屬疑問。