熱身賽上演「米蘭打吡」，AC米蘭同國際米蘭飛到澳洲交鋒，A米今夏聘請前曼聯領隊魯賓艾摩廉執教，呢位葡萄牙名帥必定希望盡快取得佳績鞏固帥位，相信會要求球員以認真態度應戰，力爭贏波。國米缺少兩位主力射手拿達路馬天尼斯及馬古斯杜林，攻力難免大受削弱。再睇埋兩隊近3次對賽，AC米蘭獲得全勝，今場有望再下一城。（周三晚7時開賽）文:Mic少

AC米蘭上季「臨尾香」失去前4位置，無緣來屆歐聯，會方怒炒教練阿里基，搵來魯賓艾摩廉領軍，呢位41歲少帥敗走英超，難得有傳統大球會簽佢，當然要趁機省靚招牌，特別係「米蘭打吡」意義重大，贏波有助建立威望，今仗應會以正式賽事態度對待。雖然AC米蘭上場熱身賽僅打和些路迪2比2，但3位主力莫迪歷、拉菲爾利亞奧、沙利麥卡斯，以及新簽巴黎聖日耳門射手干卡路拉莫斯放完假，直接去到澳洲會合，陣容日趨完整，預料會有更佳發揮。

國米兩射手缺陣
至於上季意甲冠軍國際米蘭日前訪港踢熱身賽，同曼城打和1比1，射贏12碼，但整體演出一般，如非「藍月亮」浪費大量入波機會，恐怕國米已經輸波。國米最大不利因素係缺少拿達路馬天尼斯、馬古斯杜林，兩人上季意甲合共轟入30球，佔球隊三分之一聯賽入波，冇咗呢兩位射手，國米猶如「冇牙老虎」惡唔出樣，AC米蘭贏面比較大。