奧地利甲組聯賽開鑼，打頭陣有上季季後賽冠軍寧斯登場，主場迎戰格拉茨體育會。寧斯新一季將會出戰歐聯，夏天亦積極擴軍，強大陣容喺本土聯賽足以打橫行，首戰對住實力薄弱嘅格拉茨體育會有力打響頭炮，撐寧斯主勝！文:工廠仔

（周六凌晨1時30分開賽）

寧斯上季季後賽力壓格拉茨，重奪失落61年嘅聯賽錦標，球隊喺古巴爾帶領下踢出悅目嘅進攻足球，贏到唔少掌聲。寧斯今個夏天亦有唔少增兵動作，包括簽入克羅地亞中場祖比錫、捷克中場基斯托夫等等，整體實力喺奧地利實屬頂班，上場奧地利盃就以7比0狂數SC Kalsdorf，可見球員狀態非常理想。

格拉茨體育會實力未夠班
格拉茨體育會上季喺護級組苦戰下，最後排尾3僅僅護級成功，但季前組軍只能夠招攬自由身球員，最慘係連王牌都保唔住，法國前鋒哈拉卡迪就被今場對手寧斯挖角，實力此消彼長。事實上格拉茨體育會嘅實力同寧斯有好大段距離，差距亦反映喺兩軍對戰成績上，翻查近4次對賽，寧斯有3勝1負成績，今場捧寧斯旗開得勝。