女子非國盃A組第2輪，兩支喺首輪贏波球隊交鋒，東道主摩洛哥女足迎戰阿爾及利亞女足。摩洛哥上屆喺決賽飲恨，今屆再喺主場出擊決心好大，阿爾及利亞面對如狼似虎嘅摩洛哥頂唔到好耐，半場主勝放心捧場。文:工廠仔

（Now 638周五凌晨4時直播）

摩洛哥被視為今屆冠軍熱門，開鑼戰表現非常對辦，清風送爽4比0大破肯尼亞女足，效力巴塞隆拿女足嘅18歲新星艾絲拉芙意外擔正，發揮極大影響力，摩洛哥上半場瘋狂壓逼下連入3球，尾段已經收起主力休息。摩洛哥搶韁踢法唔係決賽周先開始，佢哋近5場賽事，有4次喺上半場領先，其中3場贏2球或以上。

塞內加爾肯尼亞細均力敵
阿爾及利亞首仗2比0擊敗塞內加爾女足，不過佢哋控球率、射門數字都低過對手，最後靠1個12碼同1次對手門將送大禮先贏到。阿爾及利亞質素同經驗都唔及摩洛哥，要捱過半場都好困難，摩洛哥半場勝值博。

同組另一場，塞內加爾對肯尼亞要爭取零的突破，不過兩隊火力偏弱，塞內加爾連續3場總入球開2球或以下；肯尼亞大敗後今場先求止血，博2.5球入球細好路。