新球季會「重新出發」嘅熱刺，季前第3場熱身賽將會作客FC悉尼。熱刺領隊迪薩比接手後，正在建立球隊體系及默契當中，職球員都仍然處於適應期，熱身賽勝負並非主要目標，連同今夏已經完成嘅兩場拍跳，熱刺近6場熱身賽，5次開2球或以下，就算熱刺贏波，相信入波亦唔會多。文:渡邊年

（HOY TV 76周三下午5時45分直播）

熱刺東訪之前，喺自家訓練場同米爾頓凱恩斯拍跳，最終小勝1比0就出發到澳紐。周日遠東第一場熱身作客奧克蘭ＦＣ，上下半各入1球，以2比0擊敗呢支上季澳職季後賽盟主。熱刺雖然連續2場贏波，但入波仍然要靠巴西前鋒李察利臣，球隊本身把握力一向偏低，上季英超38場僅攻入48球，正正就係佢哋上季捲入降班漩渦嘅主因。

要留力周日鬥車仔
球隊於轉會市場豪使超過3億鎊，搶入辛度東拿利、馬迪奧斯費南迪斯等中場猛將，但仲未收購一名可靠射手，雖然陣中仍有蘇蘭基及馬菲斯泰爾等前鋒，但就係欠缺可以扭轉局勢嘅具分量射手。迪薩比暫時喺鋒線「限米煮限飯」嘅情況下，需要利用熱身賽尋找最佳方案，勝負並非主要目標。

ＦＣ悉尼上周澳足盃輕取低組別球隊比斯活特城，今個球季已經正式開始，球隊打起狀態，今場於主場球迷打氣之下，相信可以與熱刺踢成均勢，加上熱刺完成今場後，將於嚟緊周六，同車路士於澳洲進行此行最重要嘅熱身賽，或多或少會留力，入波未必會好多。