英超各隊加緊備戰新球季，愛華頓上場0比0悶和保頓後，今場會作客另一支英冠球隊史篤城。「拖肥糖」喺莫耶斯執教下，貫徹守強攻弱嘅作風，今夏暫時亦未為前線增兵，相信唔會有太大改變，對住踢法硬淨嘅史篤城唔會有太多機會，估計都會係悶戰一場。（Now 639周三凌晨2時45分直播）文:臻贏特

愛華頓今季最大收購，係簽入中場海登夏格尼，但進攻仍然要靠晒泰亞路比利，喺基亞利殊離隊同埋伊利文尼戴耶準備轉會下，進攻創造力進一步削弱，入波難度更大。「拖肥糖」上場對保頓，照樣排出5後防陣式，班夫韋迪重傷初愈復出鎮守防線，表現唔錯，愛華頓依家個陣容難踢主動波，相信會繼續求穩以守為攻。

史篤城操得足夠頂
史篤城近期操得好足，對完布拉加同克魯，喺奧地利集訓完結前再同錫周三踢多兩場70分鐘嘅另類熱身賽，分別贏2比0同4比0，而且佢哋下星期就要踢英聯盃第1圈，球員依家已經進入狀態，同愛華頓硬碰未必輸蝕。史篤城近3場完整比賽，總入球全開2球或以下，今場頂得住「拖肥糖」，入波唔慌多。